热刺又输激嬲球迷 普帅面临被炒

xcy232323

周五(6日)凌晨英超赛事，近况低迷嘅热刺作客0比1不敌般尼茅夫，今季联赛第6次输波後跌落第10位，完场後一班热刺球迷向领队普斯迪高路狂嘘，呢位澳洲教头亦忍唔住出声反击。据报热刺正考虑换帅，下场「伦敦打吡」对车路士将成普斯迪高路嘅生死战。
热刺有苏兰基复出倒戈，孙兴民就被贬後备，早段一轮急攻不果後，17分钟就被甸恩胡积臣接应角球顶入。普斯迪高路下半场早段换入「老孙」抢攻，呢位南韩前锋曾射入但食「诈胡」，般尼茅夫亦错失多次黄金机会，最终热刺以0比1输波，近6场赛事只得1胜。
作客嘅球迷完场後不断柴台，普斯迪高路行去安抚嗰阵更爆出震耳嘘声，呢位教头亦忍唔住向部份挑衅球迷反击，佢赛後表示：「球迷好应该觉得失望，佢哋畀咗好直接嘅回应，我会接受，但我好唔锺意佢哋讲嘅嘢，因为我都系个人，不过点都要硬食，我OK。」
普斯迪高路赛後被狂嘘：https://twitter.com/i/status/1864795423820464536　
据英国传媒报道，热刺喺上月输畀叶士域治後，球会已出现换帅念头，但之後大炒曼城令计划搁置，但随住近2场联赛1和1负，距离入前4嘅目标愈嚟愈远，热刺将会再次考虑换帅，周一(9日)凌晨主场对车路士将成关键一战。