甸恩轩达臣送大礼 水晶宫0比1不敌森林

xcy232323

周二(22日)凌晨英超独脚戏，诺定咸森林主场1比0击败水晶宫，今场双方都有唔少埋门，水晶宫门将甸恩轩达臣喺国家队临时主帅卡斯利观战下「送礼」，惨成输波罪人。
上半场两队斗攻，水晶宫前锋尼基迪亚曾远射中楣角弹出，森林亦有基斯活特头槌顶中柱，直到65分钟出现入波，基斯活特禁区外起脚食唔应，甸恩轩达臣本来可以轻易扑到，点知佢竟然甩手畀个波近柱漏入。水晶宫尾段全力反扑但无功而还，森林最终小胜1比0。
27岁嘅甸恩轩达臣上星期为英格兰喺欧国联上阵，相隔近4年後再为国家队上阵，点知返到联赛就喺卡斯利面前出丑，佢可唔可以获得明年1月上任嘅新帅杜曹赏识系未知数。水晶宫领队格拉斯拿赛後表示：「轩达臣想道歉，但我唔批准，因为我哋唔想责怪任何人，佢上季同今季有好多精彩扑救拯救球队，所以佢唔需要为任何犯错道歉。」