古天奴复活！包办3入波维拉激和列斯联

xcy232323

       

        菲腊比古天奴1月以借用身份回归英超後，表现全面翻生！周四(10日)凌晨英超阿士东维拉主场迎战列斯联，古天奴个人交出1个入波同2次助攻，虽然维拉最终激战下被逼和3比3，但呢位巴西国脚嘅精彩表现，势必说服领队谢拉特用重金将佢买断。
        列斯联早段反客为主，丹尼尔占士9分钟就禁区内起脚先开纪录，但之後就系古天奴Show Time，佢30分钟中路妙射死角追平，并喺38分钟开始6分钟内，连续交出2次致命直线助攻畀积及蓝斯入波，令维拉领先到3比1。不过列斯联并冇放弃，完半场前丹尼尔占士近门撞入追番2比3，迪亚高洛兰迪63分钟建功为列斯联追和3比3完场。
        古天奴由巴塞隆拿外借维拉後，3场联赛就有2入波同2助攻，维拉领队谢拉特赛後表示：「古天奴非常优秀，佢依家感觉上好开心，我哋为佢提供比赛嘅舞台，古天奴嘅视野同洞察力非常出色，如果你唔锺意睇佢比赛就不如唔好睇波。」维拉今次借用合约入面，包含3,300万镑买断条款，如果古天奴可以Keep住个状态，维拉买断佢机会好大。