欧联又搵前「枪手」抽签 16强曾爆重抽闹剧

xcy232323

       

        欧联8强将於周五（18日）抽签，欧洲足协邀请前阿仙奴後衞施维斯达为嘉宾。呢个选人近日引起关注，皆因去年16强欧洲足协邀请艾沙维为嘉宾，事後就因工作人员失误而需要重抽，今次再由前「兵工厂」战将抽签，唔知会发生咩事呢？
        去年12月欧洲足协为欧联16强抽签时，先後出现数个重大失误。首先工作人员抽维拉利尔时未有移走曼联嘅抽签球，艾沙维巧合地抽到曼联，但由於佢哋喺小组同组，理应唔可以对垒，因此需要重抽；之後抽马体会时，代表曼联嘅抽签球冇被放入抽签池，但两队之间唔存在回避条件。一场抽签闹剧最後因有球会反对，欧洲足协决定全部重抽，而作为嘉宾嘅艾沙维亦非常无奈。
        至於8强对决组合周中全部诞生，抽签仪式将於周五（18日）举行，欧洲足协邀请咗44岁前阿仙奴同曼联球员施维斯达作为嘉宾主持抽签。施维斯达喺社交网站上表示对能参与其中感非常高兴：「好荣幸地宣布我将会帮手抽欧联8强嘅签。」不过今次又系前阿仙奴球员，唔知欧洲足协会唔会又重演闹剧呢？