马天尼斯上任葡萄牙主帅：我要见C朗！

xcy232323

       

        葡萄牙足总周一(9日)官宣，聘任马天尼斯担任葡萄牙国家队领队，为期4年，将领军出战2024欧国盃及2026世盃，而佢上任第一件事，就系要同C朗见面，果然识捞！
        西班牙籍嘅马天尼斯，系葡萄牙历来第3任外籍领队，之前2任外籍主帅巴西哥利亚领军获得1966年世盃季军，巴西史高拉利则带领葡萄牙打入2004欧国盃决赛，最後获得亚军，上2任外籍领队虽然未能捧盃，但都有一定成绩。
        49岁嘅马天尼斯2016年开始执教比利时，在2018世盃获得季军，亦带队一度升上世界排名第1，卡塔尔世盃分组赛出局後离任，1个月後就成为葡萄牙主帅，接替费兰度山度士。葡萄牙足总主席高美斯强调，马天尼斯系国家队唯一接触过嘅领队人选，近期传闻搵过摩连奴同施丹均并非事实。
        传媒最有兴趣想知，就系马天尼斯点同C朗合作，呢位西班牙教练表示：「我会同佢（C朗）见面，足球系要睇场上表现，唔系办公室内决定，卡塔尔世盃26人名单将系点兵嘅基础，C朗效力国家队19年，配得上尊重，我要同佢倾倾。」
        马天尼斯首场比赛会喺今年3月，对手系列支敦士登，紧接第2场对卢森堡，到时系畀马天尼斯同C朗刷数据嘅好机会。