卡尼向曼联证身价 吁队友小心「受伤老虎」

xcy232323

       


        曼联重返欧联第1击就要作客拜仁慕尼黑，今场主角非哈利卡尼莫属，呢位英格兰前锋原本系曼联夏天头号猎物，但因为唔想畀1亿镑(约10亿港元)转会费而搁置，令哈利卡尼最终加盟拜仁慕尼黑。哈利卡尼今场要向曼联证明1亿镑系「物有所值」，赛前更呼吁队友打醒精神，唔好畀曼联呢只「受伤老虎」有机可乘。
        曼联名宿里奥费迪南赛前表示：「拜仁对曼联本来就系殿堂级对决，加上哈利卡尼嘅背境，令人更加期待，相信好多曼联球迷，都好希望佢着嘅系曼联波衫。哈利卡尼踢过欧联决赛，但从未赢过冠军，相信佢今场会更有动力去证明自己，曼联绝对唔可以掉以轻心。」
        哈利卡尼转会拜仁慕尼黑後迅速融入，开季4场联赛入4球，同近况差劲嘅曼联系两个世界，不过哈利卡尼赛前表示：「我知道曼联依家经历困难时刻，但有时呢啲球队先系最危险，因为佢哋会有好大决心去反弹，我哋一定要好好准备，而且主场球迷要尽力声援球队。」