法甲8月最佳唔系麦巴比 输畀南野拓实

xcy232323

       

        法甲公布8月最佳球员，竟然唔系基利安麦巴比，而系由效力摩纳哥嘅日本国脚南野拓实当选，佢喺8月3仗录得3入球2助攻，状态弗爆，虽然落选早前嘅日本国家队，但攞番个8月最佳，更成为首次当选法甲每月最佳嘅日本人，算系攞番个安慰奖。
        南野拓实喺8月共上阵3场，首仗86分钟後备入替即贡献助攻，协助球队大胜克莱蒙特4比2，第2场对斯特拉斯堡，南野拓实2传1射协助摩纳哥赢3比0，第3场亦攻入1球，结果摩纳哥同南特打成3比3平手。
        至於麦巴比，失落8月最佳主要系因为佢同巴黎圣日耳门嘅续约问题闹僵，首仗被雪藏，但佢第2同第3场总共入咗3球，并无助攻；虽然麦巴比同PSG关系已缓和，现时更累积7球高踞射手榜榜首，但单计8月表现，佢的确唔及南野拓实咁标青。