马天尼斯受重创 坦哈格：情况好坏！

xcy232323

       


        曼联周日(4日)英超3比0大破韦斯咸，伤兵回归後即踢出3连胜，可惜今仗又再添伤患，复出冇耐嘅利辛度马天尼斯下半场伤出，怀疑伤及膝部韧带，领队坦哈格形容佢情况「好坏」，似乎已就诊断结果做最坏打算。
        利辛度马天尼斯上年9月跖骨受伤，抖咗差唔多4个月，今仗系佢复出後第4仗，下半场同华迪美高法尔一次争波，右膝疑被压伤，最後痛苦被扶离场。坦哈格赛後表示：「我唔知详情，但睇落情况好坏，要等未来几日作出正确诊断，呢一刻我哋好悲伤，只可以祈祷情况唔系咁差。」
        曼联中坚人手足够，哈利马古尼、华拉尼、庄尼伊云斯同域陀连迪路夫都可以候命，不过当中冇人具备利辛度马天尼斯嘅後场组织能力，如果呢位阿根廷国脚真系长抖，对曼联争夺欧联资格会系极大打击。