莫迪历金球！皇马1比0赢西维尔

xcy232323

       


        周一(26日)凌晨西甲赛事，皇家马德里主场1比0险胜西维尔，喺榜首优势拉开至8分。皇马今仗久攻不下，去到尾声先靠老将莫迪历嘅「天外飞仙」世界波拯救，教练安察洛堤赛後表明仍然希望莫迪历会答应续约。
        今场系37岁沙治奥拉莫斯3年前离开皇马後，第1次返巴拿贝球场倒戈，不过主角光环最终落喺38岁嘅莫迪历身上。皇马今场围攻西维尔，但有入波被VAR作废、又有射门中柱，加上西维尔门将尼兰特「上身」，令皇马迟迟入唔到波。当莫迪历75分钟入替後，只系6分钟就喺禁区外精彩控球，再拉弓轰入世界波，为皇马一箭定江山。
        皇马教练安察洛堤赛後表示：「好精彩嘅入波，莫迪历体力充沛，落场後对球队帮助好大，放佢喺後备系困难决定，但佢仍然系全队嘅榜样。」莫迪历合约季尾完结，盛传佢将会选择离队，不过安察洛堤仍想留人：「大家都觉得莫迪历就快收山，但佢并冇咁谂，年龄只系一个数字，我唔知佢对做後备有咩睇法，但我觉得落场比赛质量比数量更重要，球会仲有几个月时间处理。」