【有片】尼马养伤1年感动回归 希拉尔赢5比4

xcy232323

周二(22日)凌晨亚冠盃B组，巴西球星尼马养伤超过1年後，再度为沙特阿拉伯豪门希拉尔披甲。呢位32岁前锋喺上阵嘅十几分钟表现活跃，扭波、射波、通坑渠风采依然，希拉尔最终喺10人应战下，戏剧性5比4击败上届冠军艾阿恩，小组3战全胜高踞榜首。
尼马上年以天价加盟希拉尔，但只系踢咗5场就膝部十字韧带撕裂，养伤369日後周二感动回归。今场作客上届亚冠盟主艾阿恩，尼马先任後备，希拉尔上半场顺利领先3比1；换边後双方继续斗攻，入球梅花间竹，77分钟希拉尔领先5比3嗰阵，尼马就粉墨登场。
尼马复出片段：https://twitter.com/i/status/1848438686704119881　
尼马父母、女友Bruna Biancardi同女儿Mavie都喺观众席上见证，虽然呢位10号球星落场冇耐，希拉尔就有艾布利希被逐，不过尼马表现相当抢镜，一次反击射远柱死角被门将飞尽手指尖托出，亦有潇洒通坑渠过人後博到犯规，最终艾阿恩喺补时入多球，但难阻尼马复出战赢波。
尼马赛後兴奋表示：「我感觉好好......我经常可以效力好嘅球队，真系好开心，我返嚟啦！我返嚟啦！」尼马加盟希拉尔後上阵过6场，交出1个入波同3次助攻，佢同希拉尔嘅合约喺明年夏天完结，不过球会有权自动延长合约多1年。