C朗再炮轰红魔坦Sir：佢哋对我太差 我唔会尊重佢哋

xcy232323

葡萄牙巨星C朗离开曼联接近2年，但对於红魔鬼及领队坦哈格嘅怨恨仍未消除，佢出席欧国联对克罗地亚嘅赛前记者会上，再度炮轰曼联会方及坦哈格当年对佢态度非常差，所以自己亦唔需要尊重佢哋。
C朗2022年11月接受专访，公开数臭曼联及坦哈格，导致双方关系破裂，并转投沙特阿拉伯球队艾纳斯。呢位39岁射手出席欧国联记者会，被问到是否愿意喺国家队担任後备，C朗声称自己可以一直踢正选，直至挂靴，并旧事重提讲番喺曼联屈居後备，令佢受到伤害：「我一直尊重各种决定，唔只系领队嘅决定，队友嘅决定，我都会尊重，但系佢哋(曼联)当时对我嘅态度非常差，其实只要有基本职业操守嘅领队，我都会尊重，如果连基本职业操守都冇，争议自然会出现。」C朗言下之意，似乎暗寸坦哈格当年安排佢系做後备，属於冇职业操守。
不过，C朗喺上届世界盃及今届欧国盃，表现都欠佳，唔少球迷认为佢唔应该再担任葡萄牙国家队正选。葡萄牙将於9月6日及9日凌晨欧国联分别对克罗地亚、苏格兰，C朗讲出上述一番说话後，相信领队马天尼斯唔敢收起佢。