唔使再罚跑 曼联输波後放假2天

xcy232323

       


        曼联喺英超连输2场後，原本以为好稳阵嘅前4席位出现暗涌，同季初要球员喺输波後「罚跑」反省唔同，据《The Athletic》报道，主帅坦哈格喺对韦斯咸後，决定放球员2日假「叉叉电」，希望球员可以喺密集赛程中休养生息，以最佳状态迎接剩低4场联赛大战。
        曼联开季大败宾福特後，坦哈格曾取消球员休假，亲身陪球员「罚跑」近14公里，呢招被视为曼联球员「醒觉」嘅转捩点。虽然坦哈格铁腕治军有效，但亦要识得执生，曼联近期赛程密集，英超2连败後球员身心俱疲，所以坦哈格就决定放多球员1日假。
        喺英联盃同英足盃都杀到入决赛，曼联今季已经踢咗57场波，世盃後平均每3.8日就要踢1场，加上球队伤兵不断，坦哈格亦绝少大幅轮换。距离下场系周六(13日)对狼队，坦哈格表示：「自圣诞节之後，我哋第1次有1个星期去备战，球员需要休息，搵番能量继续前进。最大嘅疲劳系精神上，只要你意志够强，就可以承受得到。」