白礼顿超级金球逼和曼城 锁定欧霸盃资格

xcy232323

       

        周四(25日)凌晨英超赛事，白礼顿主场1比1逼和盟主曼城，终止对方联赛11连胜走势，呢1分亦锁定白礼顿史上最高嘅第6名位置，来季会历史性出战欧霸盃赛事。白礼顿今场演出压倒曼城，19岁新星安斯素更30码外轰入世界波，获誉为英超全季金球之一，睇到球迷拍烂手掌。
        曼城虽然已经夺冠，但今场照派艾宁夏兰特、奇云迪布尼等主力上阵，上场已获欧洲赛资格嘅白礼顿，亦需要1分锁定欧霸盃入场券，两队快上快落制造唔少攻门。25分钟艾宁夏兰特突破防线，唔贪攻交畀看人看管嘅菲尔科顿射入；白礼顿之後有唔少攻门，包括三笘薰入波惨食诈胡。
        全场有18次攻门嘅白礼顿，38分钟拎到精彩入波，巴拉圭19岁新星安斯素中场攞波後，推前两步即离门30码炮弹式轰入死角，坐龙门後面嘅曼城球迷都不禁为佢鼓掌。曼城尾段亦有艾宁夏兰特入波被判犯规在先，最终两队踢成1比1平手。
        喺只剩1轮联赛下，白礼顿领先第7位嘅阿士东维拉4分，成功锁定欧霸盃资格。白礼顿创会121年来首度进军欧洲赛，完场後主场亦奏起欧霸盃音乐，领队迪萨比赛後表示：「面对曼城总系难踢，但我哋踢得好好，值得拎到呢1分，值得出战欧霸盃。」
        至於安斯素今场嘅世界波，被誉为今季英超全年金球热门之一，前英格兰国脚列纳大赞：「呢球系C朗级数射门，好神奇嘅射门，我好耐未喺英超睇过咁精彩嘅入波，龙门飞尽都差5码，顶尖嘅技术！」安斯素今季只踢过6次正选，但已经入咗4球，白礼顿又出一个明日之星。