解构欧洲赛形势 英超煞科3雄抢最後1席

xcy232323

       

        英超嚟紧星期日(28日)煞科，争崩头嘅欧洲赛席位亦只剩低少少悬念，欧联4队同欧霸盃2队都尘埃落定，最後1张欧协联入场券会由热刺、阿士东维拉同宾福特3队竞逐。不过，英超下季仍有机会有8队出战欧洲赛，视乎韦斯咸可唔可以称霸欧协联。
        根据英超嘅欧洲赛名额分配，一般情况下系联赛前4名直入欧联分组赛(曼城、阿仙奴、纽卡素、曼联)，联赛第5名(利物浦)同英足盃冠军(曼城/曼联)就踢欧霸盃，但由於英足盃冠军已经锁定欧联席位，所以名额会让畀联赛第6名(白礼顿)。
        至於欧协联资格原本属於英联盃冠军(曼联)，同样道理喺曼联已入前4之下，名额会顺延畀联赛第7位，呢个席位目前由阿士东维拉(58分)占据，但只系比热刺(57分)同宾福特(56分)多1分同2分，3队将会喺煞科日争夺第7位。
        除咗「正常」嘅7个欧洲赛席位，英超下季有机会有第8队参赛，依家喺英超排14位嘅韦斯咸，如果喺欧协联决赛赢费伦天拿捧盃，就可以欧协联冠军身份直入欧霸盃分组赛。至於曼城若果赢得欧联冠军，喺联赛嘅欧洲赛席位系唔可以转让畀其他球队。
        英超下季欧洲赛资格
        欧联：曼城、阿仙奴、纽卡素、曼联
        欧霸盃：利物浦、白礼顿、*韦斯咸(若夺欧协联冠军)
        欧协联：维拉/热刺/宾福特